"நான் ஜனவரி மாதம் பதவி விலகுகிறேன்" - டத்தோஸ்ரீ சாமிவேலு அறிவிப்பு

30-09-2010 (17:27:03)

ம.இ.கா. தேசியத் தலைவர் டத்தோஸ்ரீ ச. சாமிவேலு அடுத்த ஆண்டு ஜனவரி மாதம் பதவியில் இருந்து ஓய்வு பெறப்போவதாக அறிவித்துள்ளார். இப்போது தேசியத் துணைத்தலைவராக இருக்கும் டத்தோ ஜி. பழனிவேல், ம.இ.கா.வின் தேசியத் தலைவராக பொறுப்பேற்கும் வகையில் இந்த பதவி விலகல் அமையும் என எதிர்பார்க்கப்படுகிறது. "நான் ஏற்கனவே மத்திய செயலவைக் கூட்டத்தில் இந்த முடிவை சொல்லி விட்டேன். இருந்தாலும் இன்று அதை அதிகாரப்பூர்வமாக அறிவிக்கிறேன்" என டத்தோஸ்ரீ சாமிவேலு மத்திய செயலவை உறுப்பினர்கள் மத்தியில் சொன்னார். 1979-ஆம் ஆண்டு முதல் ம.இ.கா.வின் தேசியத்தலைவராக பதவி வகிக்கிறார். இதற்காக இவர் 11 முறை தேர்வு செய்யப்பட்டிருக்கிறார். மலேசிய அமைச்சரவையில் நீண்ட காலம் பதவியில் இருந்தவர் என்ற பெருமை சாமிவேலுவுக்கு உண்டு. 2008-ஆம் ஆண்டு நடந்த தேர்தலில் இவர் வெற்றி வாய்ப்பை இழக்கும்வரை பொதுப்பணித்துறை அமைச்சராக இருந்தார் என்பது குறிப்பிடத்தக்கது.