மலேசிய கலைத்துறையின் மாபெரும் கலைஞர் ரெ.சண்முகம் காலமானார்

09-10-2010 (13:53:50)

மலேசியாவின் முன்னணிக் கலைஞரும் கவிஞரும் எல்லோராலும் செவ்விசைச் சித்தர் என்று செல்லமாக அழைக்கப்படுபவருமான ரெ.சண்முகம் நேற்று இரவு 11 மணி அளவில் காலமானார். எந்த வகையான சந்தத்திலும் பாடல் பாடக்கூடிய ஆற்றலும் குரல்வளமும் கொண்ட ரெ. சண்முகம் சில காலமாகவே நோய்வாய்ப்பட்டிருந்தார். அவருக்கு வயது இப்போது 76. செந்தாழம்பூவாய் என வாயும் மனமும் மணக்கப்பாடிய ரெ.சண்முகம், இப்போது அமைதி அடைந்து மீளாத் துயிலில் ஆழ்ந்து விட்டார். 1934-ஆம் ஆண்டு டிசம்பர் 14-ஆம் தேதி கூலிமில் பிறந்த ரெ.சண்முகம் தனது தொடக்க கால வாழ்க்கையை இசைத்துறையில் கழித்தார். பாடலாசிரியர், கதாசிரியர், இசையமைப்பாளர், நடிகர், பாடகர், எழுத்தாளர் என்ற பல்வேறு துறைகளில் மிக சிறந்து விளங்கினார். தமிழ்ப்பள்ளியில் 4-ஆம் வகுப்பு வரை மட்டுமே கல்வி பயின்ற போதும் யாப்பு இலக்கணப் பிழியின்றி கவிதை படைப்பதில் வல்லவர், யாவருக்கும் நல்லவர். ரெ. சன்முகத்திற்கு சந்திரா என்ற மனைவியும் மலர்விழி, தர்மவதி என்று இரு மகள்களும் ரவி என்ற மகனும் உள்ளனர். ரெ.ச.வின் இறுதி ஊர்வலம் எண். 6, ஜாலான் 14/46 (பிரைவாசியா கட்டடம் எதிர்ப்புறம்) பெட்டாலிங் ஜெயாவில் உள்ள அவரது இல்லத்திலிருந்து புறப்படும்.