துன் மகாதீர் குணமடைந்து வருகிறார்

05-10-2010 (17:42:23)

மலேசிய முன்னாள் பிரதமர் துன் டாக்டர் மகாதீர் முகமட், இன்று காலை 9 மணிக்கு ஆஸ்திரேலியா மெல்போர்ன் எப்வொர்த் மருத்துவமனையிலிருந்து நலமாக வெளியேறினார். மகாதீரின் சிறப்பு அதிகாரியான சுபி யூசூப், மகாதீர் மிக விரைவாக குணமடைந்து விட்டதாகவும் இருப்பினும் தாயகம் திரும்பியதும் குறிப்பிட்ட சில காலத்துக்கு மருத்துவர்கள் மேற்பார்வையில் இருக்க வேண்டும் என்றும் மின்னஞ்சல் வழியாக பெர்னாமாவிற்கு தகவல் அனுப்பி இருக்கிறார். நெஞ்சில் நுண் கிருமிகளின் பாதிப்பால் நோய் எதிர்ப்பு சக்தி மருந்துகளைத் தொடரவும் உடலுறுப்புப் பயிற்சி தரவும் மருத்துவக்குழு துன் மகாதீரை கண்காணித்து வரும். மருத்துவமனையில் இருந்து வெளியேறினாலும் அவர் அருகில் உள்ள தங்கும் விடுதியில் ஓய்வெடுத்து வருகிறார். தங்கும் விடுதியின் சூழல் விரைவில் மகாதீரை ஆரோக்கிய நிலைக்கு கொண்டு வரும் என நம்புவதாக அவர் தெரிவித்தார். மெல்போர்னில் துன் மகாதீரோடு அவரது துணைவியார் துன் டாக்டர் சித்தி ஹஸ்மா முகமட் அலி இருக்கிறார். மெல்போர்ன் பல்கலைக்கழகத்தில் அம்னோ கிளப் ஏற்பாடு செய்திருந்த மனிதவள மேம்பாடு பற்றிய கருத்தரங்கில் கலந்து கொள்ளவே துன் மகாதீர் ஆஸ்திரேலியா சென்றார் என்பது குறிப்பிடத்தக்கது.